حي النسيم من الأحياء الجديدة واللي عمره الآن أكتر من 15 سنة صار من الأحياء المكتظة بالسكان والدليل على كلامي إنه قبل 8 سنوات كنا نصلي في المسجد 3 صفوف ودحين في الوقت الحالي بنصلي من 7 إلى 10 صفوف وتلاقي المساجد في يوم الجمعة مزحومة فوق ما تتصوروا ويارب زيدهم وياريت نشوف هادي الزحمة في صلاة الفجر، المهم نرجع لشارعنا. شارع أم المؤمنين سودة كان قبل فترة طويلة مستوى العماير فيه على 3 أدوار وكانوا أهل العماير يفرحوا بسطوحهم أيام ما تنزل المطرة، لكن بعد ما سمحوا الحبايب في أمانة جدة بتعدد الأدوار راحوا أصحاب العماير أبو 3 أدوار فطيس وصاروا مكشوفين من كل ناحية ومن كل الجيران هدا غير إنه الشارع ده والشوارع المحيطة فيه كانت داخلية وكانوا كل سكان الحي مرتاحين من الدووشة والزحمة لكن الأمانة قالت يا حبايب يا أصحاب العماير اللي في واجهة الشارع اللي حابب يقلب عمارتة تجاري يقلبها، وعينك ما تشوف إلا النور وما صدقوا أصحاب العماير اللي على واجهة الشارع واللي الدنيا دخلت قلوبهم وهاتك يا تكسير في الشقق الأرضية بعد ما خرجوا السكان منها ومافي إلا إيجارات توصل لـ 40 ألف و50 ألف تقول نحنا في شارع التحلية، لكن إيش تقول (يافرعون مين فرعنك قال مالقيت أحد يردني). وياريتها جات على الدكاكين بس إلا إيجارات الشقق صارت بأرقام فلكية لكن الواحد إيش يقول إلا يارب رحمتك، على العموم صار الشارع كله دكاكين في دكاكين سواء في الخط الرايح أو في الخط الجي وصار الزحام والغشنة عنوان هدا الشارع سواء في الليل بسبب البطون أو في الصباح بسبب المدارس المنتشرة فيه بعد ما كان حلو ورااايق والمصيبة إنه ده الشارع طوله 1500 متر تقريبا وما فيه الا مخرجين بعد ما قفل بعض الحبايب المخرج التالت بحجة إنه زحمة الشارع بهدلته هدا غير إنه لا سمح الله حصلت مصيبة أو حريقة في الحي الدفاع المدني حيحووس حوس على بال ما يوصل للحريقة هدا غير إنه الرصيف حق الشارع معدوم وحالته بالبلا والبلا لاحقه والمفروض طالما الأمانه سمحت إنه الشارع يصير تجاري ياريت تشوف حل لده الرصيف المهربد عشان يكون منظر الشارع حلوو ويكون بحق وحقيق تجاري بدل هدا الرصيف اللي مشوه شكل الشارع، هدا غير إنه الحي رغم إنه عمره 15 سنة مافيه مركز للدفاع المدني ومازال أصحاب العماير والجيران بيشتكوا من جريان الصرف الصحي والمياه الجوفية في الحي عشان كده بقول.. يا أمانة جدة شوفوا حل لرصيف شارع أم المؤمنين سودة بشكل خاص ولحي النسيم بشكل عام لأنه مويات المجاري والمياه الجوفية بدأت تلعب في الحي لعب ولكم جزيل الشكر. وعيشوا كتييييير تشوفوا كتييييير.